మీ పిల్లల భవిష్యత్తు మీ చేతుల్లోనే – తల్లిదండ్రులకి ఓ మేలుకొలుపు!

Dear అమ్మానాన్నలు, తప్పక చదవండి!

ఇటీవలి  సంధ్య థియేటర్ దగ్గర జరిగిన సంఘటన మనందరికీ మెలకువ పాఠం నేర్పించింది. ఈ సంఘటనలో ఒక చిన్నారి తన తల్లిని కోల్పోయాడు. ఆ పిల్లాడి తండ్రి చెప్పిన విషయాలు మనందరినీ ఆలోచనలో పడేసాయి. ఒక అమ్మగా, ఒక మనిషిగా రెండు ప్రశ్నలు/ఆలోచనలు కలిగాయి.

అమ్మానాన్నలుగా మన priorities ఏంటి?

మనుషులుగా మన priorities ఏంటి?

ఈ రెండు ప్రశ్నలు వేరు కాదు. రెండూ ఒకదానికొకటి పెనవేసుకుని ఉన్నాయి. ఎందుకంటే, మనం మనుషులుగా ఎదిగితేనే మంచి అమ్మానాన్నలు అవ్వగలం. అమ్మానాన్నలుగా బాధ్యతగా వ్యవహరించినప్పుడే మంచి మనుషులను మన ఇంటి నుండి బయటకి పంపగలం.

హాస్పటల్లో ఉన్న ఆ బాబు తండ్రి వివిధ చానళ్ళతో మాట్లాడుతూ చెప్పిన సంగతులు ఇవి –

1. మా బాబు అల్లు అర్జున్ కి పెద్ద ఫ్యాన్. పుష్ప సినిమా చాలా సార్లు చూశాడు.

2. మేము పుష్ప అని పిలుస్తాము.

3. వాడి సంతోషం కోసమే సినిమాకి వచ్చాము.

4. రీల్స్ కూడా చేశాడట పుష్ప సినిమా మీద.

ఇక్కడ ఆ బాబు తప్పు ఏ మాత్రం లేదు. అందరి పిల్లల్లానే Blank slate తో పుట్టాడు ఆ బాబు. ఆ పలక మీద ఏం రాస్తే అదే నేర్చుకుంటాడు. మరి ఎవరు రాస్తారు? ముఖ్యంగా అమ్మానాన్నలు. కదా?

అంటే ఈ పైన చెప్పిన ప్రతి పాయింట్ కూడా ఆ బాబు మెదడులో రాసింది, అలవాటు చేసింది ఆ బాబు తల్లిదండ్రులే.

ఒక సినిమా యాక్టర్ కి ఫ్యాన్ అవ్వడం తప్పు కాదు కానీ… ఇక్కడ మనం అర్థం చేసుకుంటే… ఆ బాబు ఫ్యాన్ అయ్యింది యాక్టర్ కి కాదు. పుష్ప అనే క్యారక్టర్ కి. అందుకే పుష్ప మీద రీల్స్ చేశాడు. ఇంట్లో వాళ్ళు ఎంకరేజ్ చేస్తూ పుష్ప… పుష్ప అని పిలిచారు.

పుష్ప 1 సినిమాకి U/A 13+ rating ఉంది. అంటే, 13 సంవత్సరాల కంటే తక్కువ వయసున్న పిల్లలు తల్లిదండ్రుల సమక్షంలోనే చూడాలి అని. అంటే దాని అర్థం ఆ వయసు పిల్లలు తప్పుగా అర్థం చేసుకునే పరిస్థితి ఉంది, జాగ్రత్త పడండి అని వార్న్ చేసినట్టే కదా?

అసలు పిల్లలు అన్నేసి సార్లు చూసేంత మంచి ఏముంది అందులో? (ఈ ఒక్క సినిమానే కాదు, ఇలాంటి అన్నీ కూడా)

– Heroism

– Elevations

– Punch dialogs

– Obscenity(అసభ్యత)

– Rules break చెయ్యడం

ఇవేగా?

చిన్న పిల్లల మెదళ్ళు sponge ముక్కల్లాంటివి. మంచి నీరు పోసినా పీల్చుకుంటుంది. విషం కలిపిన నీరు పోసినా పీల్చుకుంటుంది.

పిండినప్పుడు, ఏది పీల్చుకుంటే అదే బయటకి వస్తుంది.

సత్యం సుందరం, అమరన్ ఇలాంటి సినిమాలకి ఎందుకు అర్థరాత్రి లేచి వెళ్ళరు?

ఇంట్లో పిల్లల్ని… సత్యం, సుందరం, ముకుంద్ అని ఎందుకు పిలవరు?

సినిమా అయిపోయాక ఇంట్లో మాట్లాడుకోవడానికి బోలెడన్ని విషయాలు ఉన్నాయి, ఆడుకోవాల్సిన ఆటలు బోలెడన్ని ఉంటాయి. అయినా ఇంకా పుష్ప, పుష్ప అంటూ ఎందుకు మాట్లాడుకోవాలి?

ఒకవేళ మాట్లాడినా, ఏం చెప్పాలి?

“సినిమా బాగుంది. అల్లు అర్జున్ బాగా యాక్షన్ చేశాడు. కానీ అది సినిమా నాన్నా. అసలు ఆ సినిమాలో లాగా చెట్లు కొట్టేయడం తప్పు కదా? అలా దొంగతనంగా వాటిని అమ్మడం ఇంకా తప్పు కదా?”, అంటూ మాట్లాడితే…

పిల్లల మెదడు సినిమా వేరు, నిజ జీవితం వేరు అని తెలుసుకుంటారు. అలా కాక ఎంకరేజ్ చేస్తూ, అబ్బో, అబ్బొబ్బో అని మాట్లాడితే… పిల్లలు ఆ సినిమానే నిజం అనుకుంటారు. Aggressive గా ఉంటేనే హీరో అనుకుంటారు. Reckless గా మాట్లాడితేనే style అనుకుంటారు.

కాదా?

అలా కాక… మేజర్ ముకుంద్ గురించి, లేదా సత్యం సుందరం లో అంతర్లీనంగా దాగి ఉన్న చిన్న చిన్న సంతోషాలు, ప్రేమలు గురించి మాట్లాడుకుంటే…

Yes, Hero అంటే ఇది మేజర్ ముకుంద్ లా పోరాడేవాడు లేదా సత్యంలా భయాన్ని జయించి ధైర్యంగా చేసిన తప్పుని ఒప్పుకునేవాడు అని తెలుసుకుంటారు కదా?

ఇది ఈ తల్లిదండ్రులను తప్పుబట్టడం నా ఉద్దేశ్యం కాదు. ఒక తప్పు జరిగినప్పుడు, దాని నుండి మనం అందరం నేర్చుకునే విషయాలు ఎన్నో ఉంటాయి. అవి మాత్రమే చెప్పాలి అన్నది నా ఉద్దేశ్యం.

ఈ మధ్యనా ఒక సినిమా వచ్చింది 35 చిన్న కథ కాదు కాని పెద్దగా నేర్పిస్తుంది మరియు ఆలోచింపచేస్తుంది.

అసలు ఒక అమ్మ ఎలా ఉండాలి? నాన్నెలా ఉండాలి? అసలొక కుటుంబం అంటే ఏమిటి? విద్య ఎలా నేర్పాలి? అసలు సందేహాలు తీర్చని విద్య విద్యేనా?

గురువు ఎవరు? అతని అహం ఏమిటి? కంటిచూపు కోసం కళ్లద్దాళ్లున్నా అహం కప్పిన కళ్లకి ఏ కాంటక్టు లెన్సులు పనిచేస్తాయి?

పిల్లలంటే ఎవరు? వాళ్ల మనసేంటి? వాళ్లకేం కావాలి? వాళ్లకేం తెలుసు? వాళ్లకి తెలిసినవి నీకు తెలుసా?ముఖ్యంగా ప్రతి అమ్మ, ప్రతి నాన్న, ప్రతి గురువు చూడవలసిన చిత్రం.

ఈ సంఘటన మనకు ఒక ముఖ్యమైన పాఠాన్ని నేర్పించింది – పిల్లల మీద ప్రభావం చూపే అంశాల విషయంలో తల్లిదండ్రుల జాగ్రత్త అత్యంత అవసరం. కాబట్టి, సినిమాల విషయంలో ఆలోచించి, పిల్లలకు మంచి విలువలను నేర్పే దిశగా మారాలని

తల్లిదండ్రులుగా మన కర్తవ్యాన్ని సరిగ్గా నిర్వర్తించినప్పుడు, మంచి మనుషులుగా పిల్లల భవిష్యత్తును నిర్మించగలం. కాబట్టి, మనం మారుదాం. మన పిల్లల కోసం, మన సమాజం కోసం.

“మీ పిల్లల భవిష్యత్‌ మీ చేతుల్లో ఉంది. దానిని ఒక మంచి దిశగా మలిచే బాధ్యత మీదే.”

ధన్యవాదాలు!

  ఇట్లు,

మీ వాసంతి వెలమ.

❇❇❇❇❇